.svg){kind=logo}
Ålesund skal markere seg som Norge sin fiskerihovudstad dei komande dagane. Programmet til Ålesund sjømatfestival spenner frå politisk debatt til fiskekonkurranse.
Ålesund Sjømatfestival blir arrangert for første gang 2.-5. april.
- Festivalen er eit nytt og spennande arrangement som tar sikte på å feire, og framheve Ålesund sin rike maritime arv og sjømatindustri. Som Norge sin fiskerihovudstad har Ålesund, saman med regionen, ein djupt forankra tradisjon innan fiskeri- og havbruk, skriv arrangøren Ålesund Sentrumsforening om arrangementet.
Statssekretær Even Sagebakken (Ap) i Nærings- og fiskeridepartementet sto for den offisielle opninga på Atlanterhavsparken, men først var han på ein liten fisketur i Borgundfjorden i solskinet.
- Eg har vore på fisketur, men fekk diverre ikkje fisk, kunne Sagebakken fortelle før han offisielt klipte snora og erklærte den første Ålesund Sjømatfestival for opna.
Deretter var det faglege innlegg med havforskar Kjell Nedraas (Havforskingsinstituttet), Per Magne Eggesbø (Ramoen), og Cathrin Rabben (Ode), før det blei opna for politisk debatt mellom Even Sagebakken, Geir Inge Lien (Sp), Monica Molvær (H) og Harald Tom Nesvik (Frp).
Tema for debatten dreide seg naturleg nok om fiskeripolitikken og ikkje minst om CO2-avgifta for fiskeflåten.
- CO2-avgifta har ingen funksjon så lenge store delar av fiskeflåten ikkje har alternativt til diesel som drivstoff. Det beste politikarane kan gjere er å fjerne avgifta, og heller innføre den igjen når vi kan velge noko anna enn diesel, sa Per Magne Eggesbø.
Han viste også til at sjølv om fiskeflåten brukar store mengder diesel gjennom eit år, så blir klimaavtrykket for villfanga fisk ekstremt lavt, samanlikna med andre matkilder.
Ålesund Sjømatfestival går over fire dagar med eit variert program. Torsdag blir det karrieredag der elevar og studentar har høve til å treffe representantar frå næringa og også kan få kome om bord i ein moderne ringnotsnurpar, Strand Senior.
