.svg){kind=logo}
Ringnotsnurparen Strand Senior opna dørene i samband med karrieredag i Ålesund. Fleire hundre menneske tok turen for å sjå på båten.
- Det har vore ein jamn pågang av folk heile dagen, så det er tydeleg at det er stor interesse å sjå korleis det er om bord i eit fiskefartøy. I løpet av dagen har det nok vore fleire hundre personar om bord, seier Jon Grimstad, driftsleiar i Strand havfiske.
Karrieredagen blei arrangert som ein del av Ålesund Sjømatfestival og trekte til seg både ungdom og vaksne i alle aldrar, som har interesse for dei «blå næringane». Dei fleste var elevar frå vidaregåande eller studentar innan nautikk eller ingeniørfag. I Pir-bygget i Ålesund var det om lag 25 bedrifter som deltok på arrangementet med stands og konkurransar. Og knappe fem minutt gåavstand unna låg ringnotsnurparen Strand Senior, der alle som ville kunne kome om bord og sjå seg rundt.
Karrieredagen var ein sentral post under Ålesund Sjømatfestival som går over fire dagar. I tillegg til presentasjonar frå utvalde bedrifter, var det også faglege foredrag som tok for seg forskjellige tema. Fiskebåt og fleire lokale reiarlag hadde stand på karrieredagen og fortalte om det spennande livet på sjøen. På Fiskebåt sin stand var det også fiskarar frå trålarane Havbryn og Molnes som fortalte om korleis livet er om bord i ein fiskebåt.
Følg oss på Instagram for å sjå fleire bilde.
